Realizimi i skulpturës është një mënyrë tregimi përmes formës së subjektit, ndaj “Opus continuum” është një rrëfim i gjatë artistik i punës së skulptorit Kreshnik Xhiku me temë qëndrore qenien njerëzore.
“Gjithë punët e kësaj ekspozite janë shtrirë pak a shumë në një periudhë pesë vjeçare. Prezenca e njeriut është në të gjitha subjektet, me të cilat unë jam marrë. Kam përshtypjen se kjo ekspozitë, që po hap sot është pak ndryshe nga ato të mëparshmet. Këtë e shohin edhe kolegët e mi mesa kam biseduar e vështrojnë skulpturën time, që ka pësuar një lëvizje, një zhvillim.”
Gruaja-poezi në krijimet e artistit merr tipare të frymëzuara nga tradita shqiptare, pa shmangur frymën bashkëkohore.
“Figura e femrës është në një mënyrë tjetër. Njeriu ruan kujtime, ka kujtime, po ka gjithashtu edhe shtresëzime, të cilat i hedh në krijimtari ose gjenë frymëzimin në to. Të treja këto veprat janë tërësisht shqiptare në atë sensin e frymëzuara nga gratë shqiptare, por kanë një sens më bashkëkohorë në mënyrën se si janë bërë.”
I pyetur për ekspozimin e punimeve në hapësirat publike, skulptori përgjigjet:
“Natyrisht që duhet bërë gjithmonë më shumë.”
Ekspozita do të qëndrojë e çelur për dashamirësit e artit në Galerinë e Arteve të Bukura.